Í tengslum við þverfaglegt meistaranám í haf- og strandsvæðastjórnun býður Háskólasetur Vestfjarða upp á 60 einingar í námskeiðum á sumarönn. Hvert 6 eininga námskeið er kennt í þriggja vikna lotu og alls eru í boði 10 námskeið. Meistaranámið er samstarfsverkefni Háskólaseturs Vestfjarða og Háskólans á Akureyri.

Námskeiðin eru opin námsmönnum úr öllum háskólum, sem þó þurfa að standast almenn inntökuskilyrði námsins og hljóta samþykki meistaranámsnefndar. Þótt námskeiðin séu á meistarastigi geta lengra komnir nemar í grunnnámi einnig sótt um (sjá nánar undir forkröfur). Námskeiðin eru einkum gagnleg fyrir námsmenn á sviði náttúru- og félagsvísinda.

Samkvæmt samningi milli Háskólans á Akureyri og Háskóla Íslands geta námsmenn auðveldlega sótt námskeið hvors skóla um sig gegn vægu aukainnritunargjald (sjá nánar undir forkröfur).

Námskeiðin eru jafnframt opin fyrir þátttakendum úr atvinnulífinu, sem þó þurfa einnig að standast almenn inntökuskilyrði námsins og hljóta samþykki meistaranámsnefndar (sjá nánar undir forkröfur). Námskeiðin eru einkum gagnleg fyrir fagaðila á sviði skipulagsmála, auðlindanýtingar, rannsókna, umhverfismats eða öðrum tengdum vettvangi.

Gert er ráð fyrir litlum nemendahópum sem tryggir greiðan aðgang að kennurum. Mikil áhersla er lögð á að kennarar séu bæði vel metnir vísindamenn á sínu sviði sem og góðir kennarar. Kennsluaðferðir eru fjölbreyttar og áhersla lögð á fyrirlestra í bland við verkefna- og rannsóknavinnu og munu nemendur í flestum tilfellum skila greiningu og niðurstöðum í formi skýrslna, ritgerða og fyrirlestra. Áhersla er lögð á að verkefnavinna og athuganir byggist á raunaðstæðum og séu í tengslum við atvinnulíf og stofnanir á viðkomandi sviðum.

Nánari upplýsingar um tímasetningar námskeiða sjá í kennsluáætlun námsins. Kennslan fer fram á ensku.